कर्करोगाची प्राथमिक लक्षणे काय आहेत?

कॅन्सरचे मुख्य प्रकार आणि लक्षणे याबाबत इत्यंभूत माहिती!

कॅन्सर अर्थात कर्करोग आजही जगासमोरील एक जीवघेणी समस्या आहे. हजारो लोक दरवर्षी कर्करोगामुळे मृत्यू पावतात. पहिल्यांदा जेव्हा कर्करोगाचा जगाशी सामना झाला तेव्हा एक समज निर्माण झाला की जे धुम्रपान करतात त्यांनाच कर्करोग होतो किंवा तंबाखू खाल्ल्यानेच कर्करोग होतो. पण हळूहळू पोटाचा कर्करोग, स्तनांचा कर्करोग आणि अन्य कर्करोग जगासमोर उलगडू लागले आणि हे सत्य समोर आले की कर्करोग कोणालाही आणि कसाही होऊ शकतो आणि तेव्हापासून कर्करोगाची जास्त भीती निर्माण झाली. सगळ्यात भयानक गोष्ट म्हणजे कधी कधी कर्करोग शरीरात असूनही कळत नाही. पण जस जशी वर्षे लोटली तस तसे विज्ञान प्रगत झाले आणि आता कर्करोगापासून वाचवणारे उपचारही आलेत. पण तरी आजही जनमानसात कर्करोगाबद्दल जागरुकता नाही किंवा त्यांना त्याबद्दल काही माहिती नाही. त्याच दृष्टीने थोडी जागरुकता निर्माण करावी यासाठी आम्ही या विशेष लेखातून तुम्हाला कर्करोग आणि त्याच्या लक्षणांबद्दल विस्तृत माहिती देणार आहोत.

कॅन्सर म्हणजे काय

कर्करोग हा आता एक सामान्य आजार झाला आहे त्यामुळे त्याबद्दल प्रत्येकाला माहिती असणे गरजेचे आहे की नक्की कर्करोग आहे तरी काय? आपलं शरीर हे पेशींनी बनलेलं असतं आणि शरीराचा विकास हा पेशी दुभंगल्यानेच होतो. जोवर आपण 18 वर्षांचे होतो तोवर ह्या पेशी अरबो वेळा दुभंगल्या जातात. पेशींचं हे विभाजन एका रचनेनुसार होतं असतं आणि ते नियंत्रणात असतं. कर्करोगाचा आजारही याच पेशींच्या विभाजनामुळे होतो. पेशींचे विभाजन हे आपल्या शरीराच्या विकासासाठी अतिशय गरजेचे आहे, पण हे विभाजन नियंत्रणात रहायला हवे. जर हे विभाजन नियंत्रणाबाहेर गेले की माणूस कर्करोगाला बळी पडतो. आपण आता कर्करोगाचे काही प्रमुख प्रकार आणि त्याची लक्षणे यांबद्दल जाणून घेऊ.

सर्वाइकल कॅन्सर आणि त्याची लक्षणे

कॅन्सरच्या प्रकारातील सगळ्यात वेगाने पसरत जाणारा कॅन्सर आहे सर्वाइकल कॅन्सर, हा कॅन्सर स्त्रियांमध्ये आढळतो. ज्या स्त्रिया आपल्या आरोग्याकडे दुर्लक्ष करतात त्यांच्या भोवती हा कर्करोग लवकर विळखा घालतो. या कॅन्सरमध्ये स्त्रियांच्या गर्भाशयातील कोशिकांमध्ये अनियमित वृद्धी होऊ लागते आणि कॅन्सर जन्माला येतो. या कॅन्सरची काही लक्षणे म्हणजे सेक्स करताना योनीमध्ये वेदना होणे, योनीतून लाल रक्त बाहेर पडत अचानक डिस्चार्ज होणे, खूप थकवा जाणवणे, पाय दुखणे, चिडचिड होणेम कशातच मन न लागणे ही आहेत.

स्तनांचा कर्करोग

हा स्तनांचा कर्करोग सुद्धा स्त्रियांमध्येच पाहायला मिळतो पण याचा अर्थ हा नाही की कर्करोग पुरुषांना होत नाही. या कॅन्सर दरम्यान सुरुवातीला स्तनांवर एक गाठ तयार होत असल्याची जाणीव होते. हि गाठ हळूहळू पसरते आणि त्यातून कॅन्सरचा विळखा जीवाला पडतो. यासाठी वेळोवेळी आपल्या स्तनांची तपासणी करणे उत्तम होय. स्तनांच्या त्वचेचा रंग बदलणे, स्तन कमजोर दिसणे आणि लटकू लागणे, एका किंवा दोन्ही स्तनांचा आकार बदलणे हि काही स्तनांच्या कर्करोगाची सामान्य लक्षणे आहेत. हि लक्षणे दिसल्यास आवर्जून डॉक्टरांचा सल्ला घ्यावा.

ब्लड कॅन्सर

सर्वात वेगाने पसरणारा आणि घातक असणारा एक कर्करोगाचा प्रकार म्हणजे रक्ताचा कर्करोग होय. या कर्करोगात मनुष्याच्या शरीरातील रक्तांच्या पेशीत कॅन्सर वाढू लागतो. यामुळे शरीरात रक्ताची कमी निर्माण होते आणि हा कर्करोग वेगाने शरीरात पसरू लागतो. थकवा जाणवणे, अचानक शरीरावर जखम होणे, सतत डोके दुखणे, रात्रीचा खूप घाम येणे, दाढ दुखू लागणे, खूप ताप येणे, श्वास घेण्यात समस्या निर्माण होणे यांसारख्या समस्या एकामागोमग एक दिसू लागल्या की ती रक्ताच्या कर्करोगाची लक्षणे समजावीत आणि शक्य तितक्या लवकर डॉक्टरांकडून उपचार सुरु करावेत.

फुफ्फुसांचा कर्करोग

लंग कॅन्सर ज्याला फुफ्फुसांचा कर्करोग असेही म्हटले जाते. या कर्करोगाच्या प्रकारात मनुष्याच्या फुफ्फुसांची स्थिती अतिशय खराब होते. श्वास घेण्यात अडचण निर्माण होते, हाडे आणि सांधे दुखु लागतात. खूप अशक्तपणा आणि थकवा जाणवतो. हि या कर्करोगाची काही प्राथमिक लक्षणे आहेत. प्रदूषण आणि धुम्रपान यांमुळे हा कर्करोग मोठ्या प्रमाणावर पसरतो. तर मंडळी असे अनेक कर्करोगाचे प्रकार आहेत जे तुमच्या शरीरासाठी आणि जीवासाठी घातक आहे. त्यामुळे आपल्या आरोग्याकडे आणि खाण्या पिण्याकडे विशेष लक्ष द्या आणि सुरक्षित राहा.